變心 全集 - 20130730
日治時代，北門口彼箍圍仔（hit-khoo-uî-á）是彰化城一个誠鬧熱ê所在，伊倚火車頭ê東爿面、彰化城ê北爿面；彰化火車頭是台灣鐵枝路海線kap山線交會ê所在，南北二路來來去去ê旅客攏愛tī tsia坐火車、換火車，致使來來去去ê人誠濟，鬧熱滾滾。
蹛佇彰化海口—伸港、線西附近ê人，真歹趁食，有足濟人攏溢來遮做生理；人濟ê所在就有生理，啥mih生理都有人做，誠濟tī tsia做生理趁著錢ê，lóng會tī tsia買厝，所以tsia蹛好額人。
Tsia ê好額人當中，有一戶人家兜誠gâu做生理，開工場做紙牌仔，也咧開飯店，趁足濟錢；生十偌ê囡仔，lóng晟養甲誠成功，有做醫生ê，也有做生理ê；有做老師ê，嘛有做律師ê…。毋過，伊嘛tsiânn「辛苦」，因為伊娶幾若个某。
阿仁是我細漢時ê囡仔伴，就出世tī北門口這間好額人īn兜;伊毋但愛運動，籃球、排球、peh山…，逐項都會曉；koh會耍，是阮這tūn囡仔伴ê囡仔頭王，tiānn-tiānn𤆬阮去四界耍；嘛tsiânn-gâu讀冊，逐擺考試lóng排tī我頭前，tsiânn濟人攏足佩服伊；伊做人熱心koh四海，有時陣，伊會辦一桌仔豐沛、豐沛ê料理，kap逐家tām-sám一下；tī彼ê散赤年代，伊tiānn-tiānn teh幫贊一寡較散赤ê同窗。嘛bat做過阮這班ê班長，不只仔有人緣。
有一工ê歇睏時，阿仁雄雄徛佇阮兜門口，大細聲咻：「阿生矣！今仔日下晡敢有閒？咱來去教育學院拍籃球。好無？」
聽著阿仁tī樓跤大細聲咻，我驚阮老爸聽著，趕緊出來招呼伊：「你嘛較細聲咧！若beh咻，嘛愛講咱beh來去教育學院讀冊；若無，等--咧予阮老爸聽著我欲出去拍球，轉來我著閣討皮疼。你踮樓跤小等一下，我鞋穿一下，連鞭（liâm-mi）就好。」
無偌久，阮來到教育學院ê球場，球場內tú好tàu有六个人，分做兩組來對削；拍無偌久，人就一直拑倚--來，lóng-tsóng koh加一組三ê人，阮就順勢拍hōo輸，讓別人拍，趕緊suan去讀冊準備考大學，若考無牢，恐驚仔著ài像囡仔時代koh去飼牛。
逐擺去教育學院拍球時，我lóng會順紲紮一、兩本冊，摸蜊仔兼洗褲，一來，球若拍忝，會當歇落來加減讀一寡冊；二來，轉來厝裡若拄著老爸，才有理由thang交代，若無，就討會皮疼。雖bóng老爸無讀冊，毋koh伊教囡仔是足嚴格。
讀冊時代，逐家lóng知影我是出名愛拍球ê，對小學、國中、高中到大學lóng仝款；逐个好朋友若欲拍球，毋管是籃球、排球抑是野球，lóng一定會招我，欠我一跤就無好耍，而且我是足「好跤ê」，有招就行。致使我有一tūn「死忠ê」，tiānn-tiānn lóng佇歇睏時仔，相招走去彼个老所在—教育學院做伙拍球kap𨑨迌；阮毋是歹囡仔，毋是干焦會曉耍kap拍球niā-niā，有當時仔，為著欲kā爸母交代，嘛會定定相招做伙讀tām-po̍h-á冊。
Tú開始，阮這陣佇遮leh『混』ê少年家，kan-tann幾个仔niā-niā，毋過，過無偌久，這ê所在就若親像著傳染病仝款，一ê報一ê，人一直拑倚來，濟kah一捾若肉粽；有「好班ê」，也有「歹班ê」；有來讀冊ê，猶有來拍球ê，也有來摸蜊兼洗褲ê；有來交朋友ê，也有來問數學、問英文ê…，tī遮，我交著足濟朋友。
歇熱了，大學放榜，Tī我去基隆讀大學時，阿仁嘛考牢南部一間tsiânn出名ê國立大學，真無簡單。伊毋若gâu讀冊，人嘛生著誠緣投，喙水（tshuì-suí）閣好，所以tú入學無偌久，in彼班上媠ê「美女」就予伊奅（phānn）去。
雖bóng才識似無偌久，毋koh兩人親像hōo糊仔黏做伙仝款，剝袂開；毋管好天抑是透風落雨；也毋管上課抑是歇睏時，兩人逐工都牽出牽入；毋管歇寒、歇熱，阿仁嘛lóng會tshuā伊轉去彰化厝內佮爸母做伙蹛，īn是人人欣羨ê一對。
就按呢，兩人一行五、六年，大學出業無偌久，毋免媒人紹介，就順其自然行入禮堂做翁某；Tī彼ê年代，自由戀愛做翁某ê較少，做媒人ê較濟。Īn結婚了無偌久，就生兩个tsiânn古錐ê寶貝囡仔，一个查某、一个查埔，家庭幸福koh美滿。
經過無幾年，伊接手家族的部份事業，雖bóng拄接手時有khah生疏，毋過，過無偌久，伊著沓沓熟手；生理愈做愈好，愈做愈tshiann-iānn，成功ê家庭kap事業hōo人呵咾koh欣羨。毋閣，hōo人koh較欣羨的是，因為生理需要來熟似的『紅粉知己』……。
我會記得，tī國中ê時，有一年，阿仁做阮hit班ê班長。Tī彼時陣，毋管是「訓導處」、抑是「教務處」，學校tiānn-tiānn會利用中晝歇睏時，招逐班ê班長來開會。就因為按呢生，hōo伊有機會來熟sāi著這ê『紅粉知己』；沓沓熟--起--來了後，煞互相來意愛，Tì-sú兩人捷捷鬥陣。
頭起先，Īn是三不五時tī學校內ê福利社相見（sann-kìnn）。有當時仔，買一罐汽水ná啉ná開講、無所不談；有當時，īn嘛會提一本冊，互相來討論問題。時間若較冗剩（liōng-siōng）leh，Īn嘛會走去樹仔跤培養一下仔氣氛，講一寡仔心內話。
沓沓熟--來了後，Īn就開始約蹛外口面ê冰果店抑是咖啡廳見面，上捷去ê所在就是佇民生路頂、倚夜市ê「月星冰果店」，kap tī孔子廟邊ê「天使西餐廳」。遐是足濟學生囡仔放學了後，Kap歇睏時上愛去ê所在；m̄-nā是開講niā-niā，也是約會ê好所在。
甜蜜ê日子總是過了較緊，一目𥍉仔，Īn兩人高中也出業。tī īn咧鬥陣ê當中，逐家lóng料想in是上四配ê一對。無疑悟，tī īn鬥陣五、六年了後，天公煞來共in兩个創治，一个考牢台北ê大學，一个煞考牢台南ê大學。
Tī彼當時，交通無今仔日ê方便，南北二路m̄-nā無高鐵，嘛無高速公路；學生宿舍也無電話，若想講欲見一个仔面，對台北到台南，坐上緊ê火車，量其約嘛著ài七點鐘；若坐較慢ê，往往ài超過１０幾點鐘，平常時只倚靠批信來維持互相ê數念。M̄-koh，日子一久，批信煞哪寫哪少--哪少……，過無偌久，煞攏無消無息；「距離」變成in兩人感情ê上大阻礙，Tì-sú兩人沓沓仔來疏遠，終其尾變kah無影無跡……。
時間過甲誠緊，一目𥍉仔，就過了１０年。
因為做生理ê關係，阿仁定定（tiānn-tiānn） ài kap人客盤撋、食飯、啉燒酒。有一暝，伊陪人客欲行入一間酒店suah攤，當當（Tng-tang）Īn佇酒店外口咧kah「MA-MA-SAN」膏膏纏ê時，佇阿仁ê面頭前，煞雄雄出現一个妖嬌美麗的小姐，予啉kah小可茫茫ê阿仁驚一下倒退三步……。
佇伊ê記智開始絞轉去往過時，伊餾過頭殼內底長躼躼ê錄影帶，才掠著一个霧霧閣誠熟似ê形影，彼（he）毋是別人，伊就是１０年前失散ê彼个查某班「班長」，雖罔阿仁猶楞楞，毋過伊有十分ê把握。
經過１０年，伊已經對『黃毛鴨頭』轉做一个媠姑娘。M̄-koh，阿仁激甲誠定著，並無kah伊相認，表面上，干焦kā伊當做是一个酒店查某leh 「âi-set-tsū」爾爾；顛倒是蕙心大大方方來kah伊拍招呼。
「蔡董ê！你頭一擺來--honnh？」蕙心這款飯碗已經捀誠久仔，啥mih場面毋捌看過，所以伊並無hōo伊ê雄雄出現驚--著。雖罔過去ê「愛人」雄雄出現tī面頭前，伊嘛是共伊當做一ê新人客仝款，表現甲予人感覺伊tsiânn親切。伊微微仔笑咧招呼這ê新人客，用伊tsiânn熟手koh自然ê動作來牽著阿仁ê手，行入這間酒店。
真濟查埔人行酒店，除了做生理佮人客盤撋，無--就是欲來啉燒酒，放鬆家己，揣一種講未出喙ê感覺。檢采阿仁毋是第一擺行酒店，伊已經是一个老船長—袂眩船，行過ê酒店超過一雙跤閣一雙手，致使原本激kah足定著ê阿仁，就按呢生，規个人lóng放鬆去。
伊講：「是啦！頭一擺來遮，我毋知影會tsiah拄好tī遮拄著妳，地球實在誠狹。」
這是in的第二攤，雖bóng阿仁佇第一攤kah人客食飯時，小可啉--淡薄仔，心頭較定著，M̄-koh，Tī這ê時陣雄雄拄著較早ê姼仔（tshit-á），想欲定著嘛定著無路來，毋但心內『小鹿亂撞』，佮伊講話嘛是咬舌-咬--舌。
兩个人量其約開講一觸久仔了後，酒kah「坐檯ê」就lóng攢齊矣。
「妳ná會用hiah老練ê動作咧對待我呢？雖bóng表面上予人感覺誠親切，M̄-koh較會hōo人感覺若親像外人咧，心內嘛會感覺礙虐（gāi-gio̍h）礙虐；妳kám袂使親像咱較早拄熟似時，彼款天真可愛ê模樣（bôo-iūnn）來對待我，咱已經熟似遐久矣。」阿仁ná講ná想著過去，īn bat做伙tī樹仔跤讀冊，bat同齊去peh山；嘛bat兩人黏相倚tī「西餐廳」內咧酸甘蜜甜……。
當當阿仁ê心思走轉去tī１０偌年前ê時空，煞雄雄hōo蕙心ê話來拍醒。
伊講：「佇這款所在咧趁食ê查某，對來遮捀場（phâng-tiûnn）ê人客lóng仝款；來者是客，阮lóng是以禮相待，對你嘛是仝款。」蕙心仝款輕聲細說紲咧講：「敢講１０偌年後，你猶咧甲意我？我這馬只不過是一个趁食查某，愛ê是錢；雖bóng我是一个tī紅塵中咧走跳ê人，M̄-koh，我是袂甲意一个毋顧某囝、毋顧家庭，閣去外口愛著一个趁食查某ê查埔人喔！」
蕙心一面講、一面用伊誠熟手ê TEMPO寬寬仔倚過阿仁ê面額（bīn-hia̍h），頭拄頭。一觸久仔，伊閣用伊彼枝幼mī-mī ê二指（jī-tsáinn）向阿仁ê鼻頭輕輕仔點一下，了後，順紲閣用伊若親像櫻桃ê喙唇佇伊ê頭額唚一个，予阿仁感覺著伊彼種１０偌年前ê風韻猶原佇咧，一點仔就無去墨著（ba̍k-tio̍h）酒店內ê風塵味。致使，這時陣ê阿仁規ê人已經魂走九霄三千里、魄散巫山十二峰。
雄雄醒起來ê阿仁煞來問一句：「妳敢猶有咧甲意我？妳ê講話佮遮ê動作，10外年來lóng無變，按呢會予我閣想著咱ê過去呢。」
「我這馬kan-tann是一个趁食查某爾爾，你堂堂是１間大公司ê頭家，阮按怎配你會過？」蕙心猶原用彼款足司奶ê氣口咧講：「你莫講耍笑！我kan-tann想欲趁你ê錢，嘛kan-tann會使趁你ê錢爾爾，你已經是一个有某有囝ê人。你莫烏白想--矣！」
蕙心彼種nńg-siô-siô的動作予阿仁感覺足感心ê；毋過聽了伊講ê話，閣敢若感覺有淡薄仔失落，是--講伊並無kā心情寫佇面ê。
自從知影蕙心佇遮咧上班了後，阿仁三不五時就會來kā伊捀場，到底是為著欲補償過去對伊ê失落？抑是為著欲走揣過去佮伊鬥陣ê彼種感覺？毋管按怎！彼種親像閣一擺戀愛ê感覺定定予伊思思念念；有當時仔，家己一个留佇辦公室時，目睭前定定會浮出一寡１０偌年前兩个甜蜜ê鏡頭，致使伊下班了後，就足想欲去共伊看--一下。
毋閣，佇這段期間，阿仁並毋bat共酒店內發生ê代誌講予īn某知。轉去厝內，伊猶原做一ê足顧家ê查埔人，這種情形擋幾仔年，蕙心也勸家己愛顧著知己ê幸福佮家庭，儘量kā心內ê感情硩--咧，毋敢做出衝碰（tshóng-pōng）ê代誌。
這幾年來，台灣受著中國經濟開放ê影響，濟濟工場kah資金lóng徙去中國，致使真濟gâu趁錢koh敢開錢ê少年家，lóng綴tsia ê工場徙去中國；有ê是去食頭路，有ê是家己去拚天下、做頭家，聽講上濟ê時超過２００萬人去佇彼爿咧拍拚，台灣人實在有夠認命、有夠骨力。
減去遮ê gâu趁錢閣敢開錢ê少年家，台灣規个景氣沓沓仔變bái，致使台灣真濟衫褲店、餐廳、酒店佮娛樂場所變kah冷冷清清；代誌毋nā按呢爾爾，紲落去，走掉這濟工場，煞予真濟人揣無頭路，佇街仔路咧tōng-liu-lian；若有揣著頭路，嘛是kan-na ２２K爾爾，根本就無夠生活ê所費，莫怪規个社會變甲誠稀微，無啥元氣。
閣較嚴重ê是少年家揣無頭路、趁無食，煞毋敢來娶某生囝，致使老人愈來愈濟，少年ê kah囡仔愈來愈少，致使下一代ê肩胛頭愈來愈重，規个台灣社會問題變甲誠嚴重。
平常時，Īn某是一个標準ê家庭主婦，kan-na佇厝內顧兩个囡仔，挵予īn食，共īn穿予燒，毋捌插阿仁公司ê代誌，而且阿仁嘛bua̋i予伊插。久來，īn某感覺傷閒，無疑悟煞來信仰著宗教，而且信甲誠虔誠。若有閒，伊就peh起佇三樓尾點香唸佛，佇hia，伊布置一間誠莊嚴ê佛堂，伊定定佇hia唸佛保庇囡仔gâu讀冊、gâu大漢；猶保庇īn翁ê生理會大發展、大趁錢，毋閣，伊猶原過著一个足單純ê生活，跟本就毋知阿仁佇外口咧做啥mih。
雖罔台灣ê景氣一直bái落去，毋koh，阿仁並無綴人kā公司徙過去中國，嘛無kā業務擴展到中國，致使業務一直勼水（kiu-tsuí）；公司對趁錢變kah了錢，致使ài捷捷來kah親情朋友調錢。雖bóng按呢，嘛是定定無夠用。
伊為著照顧遮ê員工，kā厝內底ê私奇（sai-khia），毋管是伊家己ê錢，抑是īn某ê，伊攏提出來用。毋過，嘛是擋無幾年，伊佮真濟公司仝款，受著景氣稀微ê影響，終其尾，公司嘛是收起來。
雄雄有一工，Īn某接著一張法院ê批，才知影阿仁ê公司破產。
阿仁ê財產開了，外口閣欠人kui褲底；公司接載（tsih-tsài）袂牢、收--起來。毋過，伊ê厝內猶原十分ê平靜，平靜甲有淡薄仔使人驚惶；翁仔某兩人嘛無冤家，兩个只是恬恬sio-tuì-siòng。
有一工ê暗暝，當當（tng-tang）兩人坐佇tìn kah歪膏揤斜（uai-ko-tshi̍htshua̍h）ê客廳，恬恬仔看電視時，阿仁煞雄雄對褲袋仔提出一張紙，囥蹛桌頂欲予īn某看，紙ê頂面寫一寡字。
Īn某kā--提過來看一下，面色隨就變kah白tshang-tshang，無偌好看，無偌久，Kui个人就按呢愣--去。毋知經過偌久，Īn某才開喙講：「你這是beh創啥mih？我袂kā你簽這張beh離緣ê無lōo用紙。」
「我bua̋i簽，是為著咱ê囡仔，我bua̋i予咱ê囡仔大漢時，毋知īn老爸是啥人。」Īn某一面liah紙，一面講：「你放心!你做你去拍拚你ê事業，這是咱tau，我會好好仔晟養（tshiânn-ióng）這兩个囝仔，啥物lóng莫講。」Īn某講kah真堅定。
自從阿仁破產了後，Īn某愈mi-nuā唸經拜佛，除了攢三頓kap顧兩ê囡仔以外，伊lóng照三頓 tī īn 兜ê厝尾頂，家己設計ê佛堂唸經拜佛，向望īn翁ê生理好起來，事業會當親像過去hiah tshiann-iānn。
阿仁嘛提出查埔人ê氣魄，四界kā親情朋友借一寡錢，想欲東山再起，閣拍拚一站仔，kui-ê勢面看--來tō袂bái。毋過，時間並無徛tī伊這爿，台灣ê工場猶原陸陸續續徙過中國，而且中國本土ê工場嘛開始大漢矣，翻頭佮台灣ê工場拚生理，致使伊ê生理受著大環境ê影響，猶原離離落落，無啥起色，無偌久，公司嘛是閣收起來。
無生理做ê阿仁，煞毋知beh創啥mih，Kui工賴賴趖(luā-luā-sô)，趖仔趖！嘛是閣趖來蕙心這間店。
「是啥mih代誌？你規个人看--起來無神、無神，若親像睏無飽仝款，是昨暝閣佮大嫂冤家？為著公司ê財務？猶是為著囡仔咧操煩？」蕙心誠關心阿仁。
雖罔蕙心心內量其約仔知影阿仁ê財務狀況（tsōng-hóng）並無好，毋過，伊猶毋知影阿仁已經破產矣。
毋管蕙心按怎講，按怎kā伊司奶，阿仁應kah一句話都無，一粒頭向（ànn）低--低，Kan-tann顧伊家己啉酒，嘛毋知有聽著蕙心講ê話--無？
彼暗，無人知影鬱卒、孤單ê阿仁啉偌濟燒酒？連伊家己嘛毋知啉幾罐，家己一ê人醉佇膨椅頂睏--去，睏偌久嘛無人知。彼時，已經三更半暝，人客走了了，小姐下班ê下班。上尾仔，Tī蕙心「無番」了後，才緊叫一台「Hái-ià」送伊轉--去。
一向誠關心阿仁ê蕙心，看著昨暝阿仁鬱卒ê模樣，第二工透早，就來到阿仁īn兜欲來kā伊關心、了解；伊一面khà門，一面咻：「借問咧，Sái-sàn毋知有佇咧--無？」
這時陣，雖罔阿仁猶有淡薄仔醉醉，毋過，佇蕙心這款pin-pin-piàng-piàng若咧摧魂ê挵門聲，kā伊吵甲淡薄仔清醒，伊聽會出是蕙心ê叫聲。雖罔伊聽著蕙心ê聲，足想欲趕緊落樓跤來開門，毋過，因為昨暝啉傷濟酒，兩枝跤lóng毋聽話，行著路蹁來蹁去（phiân-lâi-phiân-khì），家己袂做主哩。
毋知蹁偌久，才來到門前開門。
「Sái-sàn！gâu早！七早八早、雄雄狂狂來恁兜拜訪，毋知會歹勢--無？」蕙心無等阿仁ê應話，就繼續講紲落去：「我這種梳妝打扮敢有成搝保險--ê？我想講這款ê打扮較袂予恁某誤會。」
蕙心誠捌代誌，為著驚īn某想傷濟，專工梳妝做搝保險ê模樣；伊閣刁工佇原地踅一輾，彼種司奶閣妖嬌ê模樣，想講欲予阿仁看較清楚咧。
無疑悟，頭殼猶咧楞楞踅（gông-gông-se̍h）ê阿仁，跟本就聽袂清楚蕙心咧講啥mih，伊哪有辦法回蕙心ê話呢（nih）？嘛看袂清楚佇遐若咧跳舞ê蕙心，閣較無可能感受著伊佇遐咧共阿仁司奶ê心情。
「你昨暝攏無睏，hoonh？目睭皮看--起來厚甲若牛皮咧!大嫂敢無佇厝內？」蕙心繼續咧問。
頭殼楞tshia-tshia的阿仁猶原無反應，干焦發（puh）一句，講：「入來坐！」毋過，伊ê目睭猶是瞌瞌（kheh-kheh）展袂開。
「勞力（lóo-la̍t）！大嫂敢無佇厝裡？」蕙心閣再問一擺。
佇伊一踏入門煞雄雄驚一tiô，紲喙閣講：「規厝間若鬼拍--著，衫仔褲抨甲規塗跤，椅頭仔嘛東倒西歪，想欲搬厝呢？哪無看著你ê心肝寶貝？」
阿仁應（ìn）講：「伊tī厝尾頂咧唸經拜佛，囡仔lóng出去讀冊；「伊」這馬定定守tī厝尾頂唸經拜佛kap煮伊家己欲食ê素食，賰--ê攏無咧插！規厝間若賰我一个人爾爾，我啥mih攏無--矣！妳來欲創啥貨？」
阿仁一面喝，一手對桌頂提一罐bí-lù，罐仔蓋一開，Bí-lù就向嚨喉空倒落去，跤手誠好，蕙心欲擋嘛擋袂赴。
這時陣，蕙心ê心內有數，伊已經phóo-phóo—á知影阿仁ê財務狀況，伊刁故意共聲調放予輕聲細說，共伊鼓勵：「人無永遠咧過年，有當時仔嘛會失覺察（sit-kak-tshat）；人生起起落落是真四常（sù-siông）
台文作品欣賞 (1)
