Gail Wonderland Blogger 歡迎來到 Gail 夢幻世界的 部落格

300箍(khoo)

300箍會當做啥代誌？佮好朋友去食一頓『299吃到飽』找一箍；猶是招一个同窗同齊去看一齣電影……。毋閣，對阿生來講，300箍卻是改變伊的一生。

60年代，台灣輕工業拄才發穎（puh-ínn），毋閣誠濟家庭猶真散赤，致使有誠濟國小的學生出業了後，無法度繼續讀國中，阿生就是其中一个。

佇國小畢業的前一個月，有一个工場的頭家來到阿生的教室揣小工。

徛佇烏枋前的老師問講：「敢有人出業了後，無愛繼續讀國中？請攑手。」

老師拄講煞的彼當陣，坐佇椅仔頂的學生囡仔，有十偌个攑手，我嘛綴咧攑手。隨後，老師一个一个共攑手的學生ê名記落--來，毋閣，老師共我留佇上路尾，毋但無共我登記，閣共我叫去烏枋前教示。

伊講：「你是毋是刁故意欲予我受氣？你的成績這呢好，無欲繼續讀初中，足無采咧！為啥物？」

才12歲的阿生拄著老師咧問，一開始嘛毋知欲講啥物，等甲老師閣問一擺時，阿生才若大舌咧講話仝款，伊講：「無、無、無--啦！阮阿爸無講欲予我閣繼續讀冊；伊ê意思就是愛我去工場做小工，我毋才毋敢攑手。坦白講我嘛真想欲閣讀冊，毋才綴人會著。」

老師紲落--講：「若按呢生，對明仔載起，逐工早課ê時，無攑手的就攏留佇教室讀冊；有攑手的就去掃便所，掃到出業。」

逐工早起，阿生佮彼十偌个同學仝款，透早就愛去學校掃便所，伊哪掃哪想：「哪會這無公平！欲閣讀冊的，就毋免掃便所；無法度閣讀的，就愛掃便所，為啥物？」伊按怎想都想無。

受著這款的刺激，阿生決定歇熱ê時，好好仔骨力趁一寡錢，通去學校註冊，因為老爸生傷濟囝，無錢通予阿生繼續讀冊。

出業了ê第二工，阿生就姑情（koo-tsiânn）厝邊ê阿兄𤆬伊去烏手仔工場做工。阿生足認真的，規个歇熱tah-tah　60工攏無歇睏，誠辛苦！毋閣，佇領月給彼工，伊算算咧，攏總趁600箍。領著錢彼當陣，伊暢甲擋袂牢，共錢袋仔捏--牢牢，哪哼歌哪走轉去厝內。

「阿爸！阿爸！你看！我這个歇熱做工趁著600箍，足歡喜咧！我交300箍予你，300箍予我，好--無？」阿生佇老爸的面頭前輕聲細說，真驚伊毋答應。

「囡仔人提遐濟錢，欲創啥物？」老爸大聲咧問。

老爸一向攏足大嚨侯空ê，予無膽的阿生講話變閣較細聲，伊講：「阿爸！這300箍予我來註冊，通好讀國中，好--無？我足想欲閣讀冊。」

拄頭仔，老爸攏無講好抑是毋好，徛佇邊仔咧慄慄掣（la̍k-la̍k-tshuah）的阿生，真驚老爸毋答應。毋閣，過一觸久仔，老爸手提著另外彼300箍恬恬仔行入去房間。

「Yeh!我會當閣去讀冊矣！」阿生若著愛國獎券咧，哪喝哪走出去揣好朋友。