Gail Wonderland Blogger 歡迎來到 Gail 夢幻世界的 部落格

台文吐大氣 02  Tai-bunn- toh-tua-khui

                                                   陳榮廷  2011-10-3

註解：原住民話是在加護病房、客家話是在急診室、台灣話是在掛號中。前客委會主委葉菊蘭講e。

      逐家來講台灣話，來學看台文，學寫台文。咱台灣人吐大氣，有伊鬱悶無奈的苦情，大氣吐了，ma

      有伊積極振作的意志。咱就愛按日常生活，ti人的情份中顯示出活力，ti積極奮進中，揣出活落去的意義。

『天然e景色無國界』

Tsiah媠e景緻、tsiah天然e風景。koh khah雜插無閒的人看著這款e景緻kap風景，ma是目睭會愣去，跤步會慢落去，心肝頭tsuann恬靜落來，這就是奇美公司 許文龍董事長，一日kah暗ti溪邊，ti海上釣魚上大e原因。

有一擺，去美國加州 tsue按小學到今，攏真好的囡仔朋友，ti怹兜蹛一暝，隔轉工透早，伊講欲tsua我去附近e公園行行leh，我直接第一个反應，講恁tsia 就是公園a，無是欲去陀leh。厝起ti森林裡，人蹛个若親像是公園底，怹的生活機能是歇睏安靜，m是食物件買媠杉、做伙飲酒唱歌拉曲。他罕罕a轉來台灣一擺ah，朋友相掙ka創，連鞭吃飯、連鞭去tsue唱歌，hoo伊感覺真奇怪，咱有錢開無路，逐个人攏tsiann無聊，講咱be-hiau生活。

會記第一擺去美國e時，ti Hawaii落機，sua驚一跳。夭壽oh，樹仔大欉細欉、鳥仔ma有翼鼓kap跤、海水藍色白漾，ham咱ti台灣看著e攏仝款，原來大自然無國界，是人e幻想造成區別， giu長距離na-na。媠就是媠，ko khah無國界。對m對leh？

『千風之歌』

『千風之歌』捷捷聽，ma-be-sian，朋友mail來e板本tsiann-tse，這个板本be-bai。

『千風之歌』歌詞是來自美國印第安人一个查某人e手，頭起先是日本人去ka譜曲，用日文作e詞，好聽無跳針。ti 2006年日本歌壇『紅白歌唱大賽』中間，木村拓哉朗誦歌詞，hoo少年e歌手秋川雅史tshann一唱成名，日本人痟一暫；咱台灣按前總統李登輝，提頭當眾唱hoo逐个人聽以後，sua宛若風行台灣數年，到今燒be退。這三種（英、日、華）歌詞，憑頭對照ka看ka想，用日文ka念唱，人的性命nah會使即爾飃撇ka看待，永遠的數念nah會激發出，hoo人即爾媠ko高尚e幻想。聽講一寡老輩个，ma-tsiann飃撇指定，ti伊家己出山hit工，著愛放這條歌hoo聽。

楊正宗老師，你出山hit工，是我用台灣話ka你朗讀數念文e，你走起tsiann媠氣，ko-tsiann飃撇。過去khah少年e時陣，你若是去hoo貴黨刑逆，嚇驚你若無加入貴黨，就未得國，你攏講無要緊，你be保衛大台灣；食ka老，你迭迭笑咱e好朋友阿潔兄晚節不保，tann-a這馬你隨著千陣風走去天頂ah，透早透暗攏teh守護著咱台灣。阿宗a，你ai-tsiann歡喜，參禮拜前鳥鼠仔兄楊醫師按美國倒轉來，叫我就約恁某囝tsua咱去墓e，ka你祭拜；伊講明年一月ma-beh-ko倒轉來，阮某問講be創啥？，怹某應講beh轉來救台灣，家治開錢買飛行機票，轉來選總統。hit工你一定會變做一隻鳥仔ti天頂踅，用你的榮光唱你愛唱e『風醉雨也醉』hit條歌，來超渡阮遮个醉生夢死e台灣人。

聽著這條『千風之歌』，hoo我ko-tsai數念著過身去e好朋友，ma-e想講此去家己性命e浮沉，就愛飃撇、ma就愛媠氣。朋友a，你leh。

感謝 IMC聯合會邱秘書寄這封mail來。