Gail Wonderland Blogger 歡迎來到 Gail 夢幻世界的 部落格

 阿爸的心肝某佮寶貝牛　　Hansen

阿爸出世佇日本時代的農業社會，物資誠欠缺，厝內散赤，無錢通讀冊，煞著愛來牽牛車，載砂石仔去賣，趁錢轉來予厝內用，誠辛苦！

阿爸生九个囡仔，五个查埔仔佮四个查某仔，日子誠艱苦，猶閣愛照顧已經倒佇眠床頂十偌冬的牽手，煞無時間通照顧九个囡仔，只好放咧予拋車輪（pha-tshia-lin），致使九个囡仔的學歷懸懸低低，有大學出業，也有干焦小學出業ê；因為囡仔生誠濟，大細漢的年紀差不止仔濟，頭尾精差有二十偌歲，真正歹照顧。

我排第八ê，當我十偌歲仔，拄捌代誌的時陣，兄哥佮大姐已經嫁娶幾若个，成家立業。彼个時陣，雖罔阿爸已經６０偌歲，為著趁阿母醫生館錢，伊猶原繼續咧牽牛車、拖砂石仔，講起來嘛誠辛苦。雖罔我干焦十偌歲仔，毋過，我的漢草上好，已經有５尺半懸，定定佮阮阿爸作伙上山坪、落溪埔去揣砂石仔。一般tiok，一工會當拖二逝砂石仔，收入嘛算袂䆀，毋閣猶是無夠阿母的醫生館錢。

我是九个囡仔內底，上捷綴阿爸牽牛車去大肚溪罟（koo）沙，佇無讀冊、歇睏時，我攏會綴阿爸去做工。趁錢轉來，阿爸若無代誌，就趕緊𤆬阮阿母去看醫生，我就去讀冊；阿爸若有代誌，就換我騎彼台碌硞馬載阿母去予醫生看，這是逐工愛作的工課。

阿母上疼--我，我每工放學轉來，攏會走去眠床邊，共阿母司奶，阿母就會楔兩角銀的私奇予我，我就暢甲掠袂牢，哪跳哪走去篩砂。

篩砂對一个十歲囡仔來講，是一件誠粗重的工課，毋過，佇篩１牛車砂仔了後，我猶有氣力偷旋去拍球，這是袂使予阿爸知影；若知，拍球轉來，攏愛食藤條配算盤。

「你這个猴死囡仔！篩１牛車砂石仔，篩無夠，猶有氣力去拍球，是毋是食傷飽、無代誌做？緊去讀冊！」聽著阿爸咧罵，我就趕緊旋去讀冊，較無代誌。

阿爸上疼阮兜彼隻牛，因為伊是阮兜上𠢕趁錢的，罟砂嘛著伊；載砂嘛著伊；拖砂嘛著伊。就因為按呢，阮攏對伊足好。佇伊咧拖牛車時，毋管牛車頂有載砂抑是無？為著減輕伊的負擔，阿爸是毋准阮起牛車頂坐。

阮定定愛買焦的王梨皮予伊食，若無，就愛去割草轉來予伊；抑是牽伊去學校的草埔食草。遮个工課是攏誠艱苦的代誌，也是誠趣味的記持；毋管阮按怎忝，伊猶是阮規家伙ê好朋友。