close
有孝 （Lîm Hàn-som）
逐个攏知影對爸母愛有孝，毋過，到底有幾个人做會到呢？有一句台灣俗語講了誠好，「講--的比做的較緊」，特別佇現代的社會，逐个無閒家己的工課，哪有閒工有孝爸母？
講是按呢講，毋過，去有孝爸母其實嘛誠簡單。親像我是一个12歲囡仔來講，頭起先（sing），我愛學會曉照顧家己的身體，莫（mài）予寒--著；莫予熱--著，才袂予爸母操煩。紲--落來，愛共家己的工課做予好，好好仔讀冊，予爸母歡喜，這--嘛是一種有孝。
「阿爸！阿爸！我來共你掠龍，予你輕鬆一下。」
「阿母！阿母！我宿題寫好矣！碗我來洗就好。」
你若佇爸母忝--的時陣，共司奶一下，爸母嘛會誠歡喜。
啥物是「有孝」？遮（tsiah）的--就是有孝，你隨時攏會當做，就看你欲做，抑（ia̍h）是毋做；只要會當（tàng）予爸母歡喜的，就是有孝。
有孝既然遮呢仔簡單，咱閣袂曉有孝，就比精牲較不如；莫（bo̍k）怪台灣有一句俗語咧講：「勸恁有孝千萬句，袂曉有孝豬狗牛。」
咱大漢了後，嘛會做人的爸母，咱敢（kám）欲向望咱ê囝兒序細（kiánn-jî-sī-sè）對咱不孝？而且「爸母疼囝長流水」；咱敢欲做一个「囝疼爸母樹尾風」的不孝子呢？
全站熱搜
留言列表
台文作品欣賞 (1)
