Gail Wonderland Blogger 歡迎來到 Gail 夢幻世界的 部落格

Tām-sám-huē第三攤---草港ê鵝肉擔

最近為著一寡俗事咧走傱，煞較無時間來招一寡仔『MA-TSI』去tām-sám，今仔日誠無簡單會當招幾个仔『MA-TSI』來去枵饞一下，這是外爾仔歡喜的代誌。幾个『MA-TSI的』參詳了後，決定這擺欲食較好一寡仔，最後阮揀這間徛佇省道１７號道路邊，頂港有名聲、下港有出名的好食鵝肉擔。

這間鵝肉店的外表並無顯目，伊是一間起有二、三十年久的２樓透天厝，毋過生理是好--甲反過。伊干焦賣早頓佮中晝頓爾爾，暗頓無賣。每工透早一開店，內底倚桌就坐甲滇--滇滇，生理好甲人客為著欲搶好位通坐，攏著愛提早來排隊；閣較譀的是：人客為著bua̋i（bô-ài）等遐久，攏著愛走去頭家咧摵麵的頭前等，家己捀菜、捀麵轉來。

阮為著欲僭（tsiàm）好位，一行數名，早早著坐著阿吉仔彼台美國進口、闊閣大範（tuā-pān）的CRV高級車，一路對彰化市沿彰草路行，駛到盡磅拄著１７號道路，倒斡就到位，誠好揣。

一到位，內行的阿隆趕緊傱入店頭排隊，準備點菜；我佮阿吉著趕緊傱入店內揣椅揣桌來坐。雖罔人客誠濟，毋過頭家彼屯人跤手嘛誠扭掠，阮等無外久，一項仔一項的菜就沓沓仔捀出來；目一𥍉，桌頂已經排好一桌扭扭（gió-gió）、鮮沢（tshinn-tshioh）鮮沢的腥臊（tshenn-tshau）；有鮮閣甜的鵝肉，糋（tsìnn）甲酥穌的蝦仔，也有炊甲芳絳絳的三角仔魚；猶閣叫一盤炒雜菜麵，內底摻幾若項海產，有花枝、蝦仁，閣有幾項仔叫袂出名的海產；毋過，人講「食魚食肉，嘛著菜佮」，上尾，阮閣點一項青菜--蕹菜來佮，規桌頂排甲洘秫秫，誠腥臊。

這擺是阮tām-sám-huē食了上腥臊的，逐家攏食甲飽tsut-tsut，足歡喜咧。毋過，人客實在真正濟，阮毋敢坐傷久，驚擔誤著頭家的生理，食差不多半點外鐘久，著趕緊離開。紲落去，阮揣一間老牌老字號的咖啡廳，伊已經開幾仔年矣，有淡薄仔名聲。坐落來了後，有人點『摩卡』，有人點『藍山』，也有人點『卡布奇諾』，無外久，規間咖啡廳著變甲芳絳絳，逐家啉咖啡配話，過了一下輕鬆的下晡。

佇這个世界景氣這呢䆀的年代，留蹛台灣本地開錢上實在，雖罔開的錢無濟，毋過對台灣的景氣上有幫贊，因為，無論你錢按怎開，錢攏猶留佇台灣內底咧絞，袂走出去，彼種經濟循環的效果是你開出去金額的幾仔倍；無親像一寡仔領１８％的，定定攏飛行機坐咧，就去外國𨑨迌，錢攏佇外國咧開，外匯著按呢一直走出去，對台灣的經濟一點仔幫贊都無，若按呢生，台灣的經濟敢會好？

人食甲５０外，身體的新陳代謝沓沓仔變慢，若做一睏食傷濟，代謝袂去，就會積蹛腹內變做油;人袂大箍，才奇怪。為著這个緣故，阮才招幾个「會合的」好朋友，無定期來『淡膳』一下。『淡膳』的意思是清淡的料理佮營養，無真濟油；嘛無真濟「Cholesterol」。上重要的是袂使食傷濟，來增加胃腸的負擔；胃腸若無負擔，病疼著袂來；人若無病疼，人著清爽；人若清爽，看起來著會青春、著會健康。這是『淡膳會』上重要的目標。