Gail Wonderland Blogger 歡迎來到 Gail 夢幻世界的 部落格

變 心（第２集）　　

                                                                   Hansen

（接頂集）Tú開始，阮這陣佇遮leh『混』ê少年家，kan-tann幾个仔niā-niā，毋過，過無偌久，這ê所在就若親像著傳染病仝款，一ê報一ê，人一直拑倚來，濟kah一捾若肉粽；有「好班ê」，也有「歹班ê」；有來讀冊ê，猶有來拍球ê，也有來摸蜊兼洗褲ê；有來交朋友ê，也有來問數學、問英文ê…，tī遮，我交著足濟朋友。

歇熱了，大學放榜，Tī我去基隆讀大學時，阿仁嘛考牢南部一間tsiânn出名ê國立大學，真無簡單。伊毋nā　gâu讀冊，人嘛生著誠緣投，喙水（tshuì-suí）閣好，所以tú入學無偌久，in彼班上媠ê「美女」就予伊奅（phānn）去。

雖bóng才識似無偌久，毋koh兩人親像hōo糊仔黏做伙仝款，剝袂開；毋管好天抑是透風落雨；也毋管上課抑是歇睏時，兩人逐工都牽出牽入；毋管歇寒、歇熱，阿仁嘛lóng會tshuā伊轉去彰化厝內佮爸母做伙蹛，īn是人人欣羨ê一對。

就按呢，兩人一行五、六年，大學出業無偌久，毋免媒人紹介，就順其自然行入禮堂做翁某；Tī彼ê年代，自由戀愛做翁某ê較少，媒人做ê較濟。Īn結婚了無偌久，就生兩个tsiânn古錐ê寶貝囡仔，一个查某、一个查埔，家庭幸福koh美滿。

經過無幾年，伊接手家族的部份事業，雖bóng拄接手時有淡薄仔生疏，毋過，過無偌久，伊著沓沓熟手；生理愈做愈好，愈做愈tshiann-iānn，成功ê家庭kap事業hōo人呵咾koh欣羨。毋閣，hōo人koh較欣羨的是，因為生理需要來熟似的『紅粉知己』……。

我會記得tī國中ê時，有一年，阿仁做阮hit班ê班長。Tī彼時陣，毋管是「訓導處」、抑是「教務處」，學校tiānn-tiānn會利用中晝歇睏時，招逐班ê班長來開會。就因為按呢生，hōo伊有機會來熟sāi著這ê『紅粉知己』；沓沓熟--起--來了後，煞互相來意愛，Tì-sú兩人捷捷鬥陣。

頭起先，Īn是三不五時tī學校內ê福利社相見（sann-kìnn）。有當時仔，買一罐汽水ná啉ná開講、無所不談；有當時，īn嘛會提一本冊，互相來討論問題。時間若較冗剩（liōng-siōng）leh，Īn會走去樹仔跤培養一下仔氣氛，講一寡仔心內話。

沓沓熟--來了後，Īn就開始約蹛外口面ê冰果店抑是咖啡廳見面，上捷去ê所在就是佇民生路頂、倚夜市ê「月星冰果店」，kap　tī孔子廟邊ê「天使西餐廳」。遐是足濟學生囡仔放學了後，Kap歇睏時上愛去ê所在；m̄-nā是開講niā-niā，也是約會ê好所在。

甜蜜ê日子總是過了較緊，一目𥍉仔，Īn兩人高中也出業。tī　īn咧鬥陣ê當中，逐家lóng料想in是上四配ê一對。無疑悟，tī　īn鬥陣五、六年了後，天公煞來共in兩个創治，一个考牢台北ê大學，一个煞考牢台南ê大學。Tī彼當時，交通無今仔日ê方便，南北二路m̄-nā無高鐵，嘛無高速公路；學生宿舍也無電話，若想講欲見一个仔面，對台北到台南，坐上緊ê火車，量其約嘛著ài七點鐘；若坐較慢ê，往往ài超過１０幾點鐘，平常時只倚靠批信來維持互相ê數念。M̄-koh，日子一久，批信煞哪寫哪少，「距離」變成in兩人感情ê上大阻礙，Tì-sú兩人沓沓仔來疏遠，終其尾變kah無影無跡……。

（猶袂煞----）